tirətor futbal timi yox bir hoviyət anlami! HƏSƏN RAŞİDİ

   

         "تیراختور "،  فوتبال تیمی یوخ، بیر هویت آنلامی!

                                                                    حسن راشدی  

40 ایل تهراندا یاشاییب و 55 ایل عؤمرومدن کئچندن سونرا جمعه گونو 25 دی 1388 تاریخینده  ایلک دفعه اولاراق بیر فوتبال اویونونون تاماشاسینا تهراندا  " آزادی " استادیومو آدلانان یئره گئتدیم !

منی ده بورا چکن سون ایللرده " تیراختور " فوتبال تیمی حاقدا اوزاقدان – یاخیندان ائشیتدیگیم چئشیتلی سؤزلر و فیکیرلر اولموشدو  !

بو گونکو مسابیقه ده "تراکتور سازی" و یا اؤزو ایله معیّن و اؤزل بیر آنلام داشییب تورکلر طرفیندن اصرارلا دئییلن " تیراختور " فوتبال تیمی ایله تهرانین مشهور فوتبال تیمی " استقلال "ین یاریشی اولاجاقدی .                                                  

بیر تعداد دوستلارلا کرج– تهران اوتوبانی ایله مسابیقه مئیدانی طرفینه یوللاندیق.

بیر رسم اولاراق هر تیمین طرفدارلاری میندیکلری ماشینا او تیمین رنگلی بایراغینی آساراق تهرانین " آزادی " استادیومونا طرف حرکت ائدیردیلر. بیزیم یانیمیزدان کئچن بیر مینیک پراید ماشینی نین  پنجره سیندن بیر گنج و تیراختورون طرفداری، قیرمیزی پارچادا تورکجه یازیلمیش " یئل یاتار طوفان یاتار یاتماز تیراختور بایراغی" نی آسمیشدی . کرج- تهران اوتوبانیندا " استقلال " تیمی نین بایراغینی ماشینلاریندان آسانلار و باصطلاح استقلال تیمی نین طرفدارلاری، هر بیر ماشیندا تیراختورون قیرمیزی بایراغینی گؤروردولر اونلارا قارشی نه جور ادبسیز و تربیه سیز حرکتلر اؤزلریندن گؤستریردیلر اوندا ایشیم یوخ !

نهایت گئدیب استادیومون پارکینگ قاپیسینا چاتدیق، هله پارکینگه چاتمامیشدان، یول قیراغیندا قیرمیزی و گؤی رنگلی تیراختور و استقلال بایراقلارینی ساتانلارین بازاری دا چیچکلنمیشدی !

من کیمی بیرینجی دفعه بورا گلنلره، سانیرام بو صحنه لر چوخ ماراقلی ایدی ؛ تهراندا حاضیرلانیب عادی ساتیجی لار طرفیندن شور و حرارتله تیراختور یانداشلارینا ساتیلان قیرمیزی بایراقلارین یازیلاری عمومیتله  تورکجه ایدی، هم عرب الیفباسی ایله و هم یئنی الیفبا ، یعنی لاتین الیفباسی ایله .

منیم گؤزومه  قیرمیزی بایراق اوستونده فارسجا یازی چوخ نادر حاللاردا  دگیردی ، لاکین انگلیس دیلینده  ، بایراقلار ، قیرمیزی بؤرکلر ، آلینباغی و بویون شالی اوستونده "  Tractor"   سؤزو یازیلمیشدی،  آما " آزادی " استادیوموندا ساتیلان بلیط لر اوزه رینده ده  انگلیسجه یازیلمیشدی :    "1970  club Traktor "  !! ؛ هانسی "تراکتور "  انگلیسجه دوز یازیلمیشدی اوندادا ایشیم یوخ !

ساتیلان قیرمیزی بایراقلاردا " یاشاسین آذربایجان "، " یاشاسین تیراختور "جومله سی باشقا یازیلاردان داها چوخ گؤزه چارپیردی .

ماشینی پارک ائدیب استادیوم قاپی سیندا باشقا دوستلاری گؤزله دیگیمیز 10- 15 دقیقه ایچینده ،   قیرمیزی تیراختور بایراغینا بورونن، باشلاریندا قیرمیزی بؤرکلر ، تورکجه یازیلمیش الینده "آذربایجان دیاریمیز  تیراختور افتخاریمیز " قیرمیزی بایراق، بوینوندا قیرمیزی شال ، گئیدیگی قیرمیزی بولوزون دوشونده Traxtur  سؤزو ، اوز- گوزونو قیرمیزی رنگله بویایانلار بالاجا اوشاقلاردان توتدو بؤیوک یاشلیلارا قدر آخین – آخین گلیردیلر ؛ بو صحنه لری گؤردوکده ندنسه 1379 -  1383 ایللر آراسی " بابک قالاسی مراسیمی "  یادیما دوشدو ؛ اوندادا ائله انسانلار ، تیر آیی نین ایکینجی  پنجشنبه و جمعه سی، بوجور و بو شوق – ذوق ایله آذربایجانین  و حتی ایرانین هر یئریندن بابک قالاسینا یوروش ائدیردیلر!

هله بیر تعداد موقعیت شناس لار،  قیرمیزی یازان فیرچالار و کئچیجی رنگلرله  ائله استادیوم قاباغیندا، تیراختورون قیزغین طرفدارلاری نین اوزونو قیرمیزی رنگله بویاییب 500 تومن  1000 تومن قازنماغی دا اونوتمامیشدیلار ، البته گؤی رنگله اسقلال طرفدارلاری نین اوزونو بویایانلاردا  وار ایدی ، آما قیرمیزی یازانلارین تعدادی داها چوخ ایدی !

ایلک اؤنجه اؤز- اؤزومه دئییردیم بو تهراندا " استقلال " تیمی نین طرفداری چوخ اولدوقدا یقین کی ، "تیراختور " طرفدارلاری آز گؤزه دگه بیلرلر ، آما بو صحنه لری گؤردوکده گؤردوم  تیراختورون یانداشلاری یالنیز تبریز ، آذربایجان و باشقا تورک دیللی اوستانلایندا یوخ ، ائله بو تهران و کرج ده بلکه " استقلال " و " پرسپولیس " طرفدارلاری قدر  اولا بیلر ؛ چونکو بو گون بورا گلنلر یالنیز تبریزدن یوخ ، ائله بو تهران ، تهران اطرافی شهرجیکلر و کرج ده یاشایان تورکلر تیراختورون قیزغین طرفدارلاری عنوانی ایله بورایا گلمیشدیلر ؛ تهران و اطراف شهرجیک لردن علاوه حتی شیراز شهریندن و فارس اوستانی نین قشقایی تورکلری، خوراسان تورکلری ، و  تورکمن تورکلری ده  تیراختورون طرفداری اولاراق استادیوما گلمیشدیلر !

هله مسابیقه دن سونرا تهراندا یاشایان تورکلرین چوخو  استادویوما گلمه دیکلریندن تاسّوفلنیریلر ، چونکو  اونلار بئله تصور ائتمیشدیلر استادیومدا یالنیز 10% یئر، تیراختور طرفدارلارینا وئره جکلر و یئرین اولماماغی تصورو ایله سئودیکلری  تیمین تشویقینه گله بیلمه میشدیلر !

مهندس صرافی ایله منیم،  اؤزل یئرده اوتوروب فوتبالا باخا بیله جگیمیزه ایمکان اولدوغو حالدا ، عادی یئرلرده و تیراختورون قیزغین طرفدارلاری  آراسیندا اوتوروب اویونا باخماغی ترجیح ائتدیک، ائله بوجور اویونلارا باخماغین لذتی ده بوندادیر !

استادیوم ایچینده ده قیرمیزی پارچالاردا ، یاشاسین آذربایجان     یاشاسین تیراختور  ، آذربایجان دیاریمیز    تیراختور افتخاریمیز ، یئل یاتار طوفان یاتار  یاتماز تیراختور بایراغی ، زنگان شهری   تیراختور طرفداری ، و بونلارا اوخشار  چوخلو شعارلار پارچالاردا یازیلیب و استادیوم  نرده لریندن آسلانمیشدی ؛ لاکین بو یازیلارین ایچیندن بیر یازی نسبتا بؤیوک پارچادا  منی و چوخلاری نین نظرینی داها چوخ اؤزونه چکدی :

تورک دیلینده مدرسه         اولمالی دیر هرکسه !

بو یازینی گورن مامورلار ،  یازی طرفینه گلیب و یازیلی پارچانی نرده اوستوندن گؤتورمک ایسته ینده بیردن تاماشاچیلار طرفیندن  گورولتولو سسله اعتراض شعارلاری اوجالدی !

مامورلار داها بو شعارلی پارچانی  ییغیشدیرماغا اصرار اائتمه دن اؤز یئرلرینه قاییتدیلر !

اویون ساعات 15:15 باشلادیقدا  استادیومون یاریسینی  قیرمیزی رنگه چئویرن تیراختور طرفدارلاری آیاق اوستونده  قیزغین و آردی کسیلمه دن شعارلارینا باشلادیلار ؛

 استادیومون بیر طرفی : 

یاشا................................ سین

باشقا طرفی :

آذر...................................بایجان !

شعاری استادیومو لرزه یه گتیریردی !

بوشعارلارلا برابر ، بارماقلاری ایله ده بوزقورد علامتی توتاراق هاوادا یئللندیریردیلر !

بوز قورد علامتی بعضی لری نین یانیندا و یا بعضی اؤلکه لرده  آشیری ناسیونالیسم سیمگه سینه چئوریلسه ده  گونئی آذربایجاندا اؤزللیکله تیراختورچولارین آراسیندا " تورک کیملیگی " و " تورک هویتی "  آنلامینی داشیماقدادیر و هئچ بیر آشیری تورکچولوک معناسیندا  دئییلدیر .

بیرآز اویون واختیندان کئچمیشدی کی ، یئنه مامورلار گلیب " تورک دیلینده مدرسه    اولمالی دیر هر کسه "  شعارلی پارچانی ییغماغا اصرار ائتدیلر کی ، تیراختور طرفدارلاری مامورلار لا درگیر اولماغی مصلحت بیلمه ییب اؤزلری بو شعاری قالدیردیلار .

اویوندان چوخ،  تیراختور یانداشلاری نین  آردی کسیلمز معنالی - مفهوملو و چئشیتلی و آهنگلی شعارلاری استادیومو هیجانا گتیریردی ، بیر آن بئله، استادیوما گلنلر کیچیک اوشاقدان توتدو  گنج  اؤیرنجی و یاشلیلارا قدر ، شعارسیز و آرام اوتورموردولار !

اویونون نتیجه سی  چوخ هیجانلا  ایکی - ایکی یه  باشا چاتدیسا ، منیم عؤمرومده ایلک دفعه فوتبال اویونونا  تهران استادیومونا گلیب بورادان اونودولماز خاطره ایله آیریلدیقیمدان علاوه ، گله جه یه داها درین آرزو و اومیدله باخاجاغیما سبب اولدو !  

 

http://www.tiraxtorfans.blogfa.com/