زنداندان باغیریر تراختور

سایت متحد هواداران - بیر اوشاق آذربایجانین شهرلرینین بیرینده یاشاییردی. بیر باش اشاقی و آتا و آناسینا کومک اولان.

او اوشاق بوی آچاندان , آتاسینین آرخاسیندا اولاراق , عایله سینه یاردیم ائله ماقا چالیشیردی.

نئچه باجی و قارداشی وار او اوشاقین و بویوک ننه سی و بویوک بابا سینین بئلی بو اوشاغا باغلی ایدی و اولارینین اللرینین فرمانی ایدی و هر ایشلری کی اولسایدی بونا دیه ر دیلر.

فوتبالا چوخلی علاقه سی اولاراق بوش اولان واقتین اوشاقلارلا کوچه لرده توپ دالیسیجاق او اوزه بو اوزه قاچاردی. گونده دکه چی بیر روزنامه ساخلاردی کی او ایندی گلیب آپاراجاق.

بو اوشاق تلویزیوندان وئریلن فوتبال مسابقه لرین هامیسینا باخیب و روزنامه لرده اولارا گوره یازیلان مطلب لری اوخویاردی , اوزونه گوره بیر کارشناس اولموشدی.

بو چالیشان اوشاق , عایله سینه کومک اولان و فوتبالا باخیشی عشقیلن ساریشاننین آدی صابیر دی.

ایللر کئچدی , دوورانلار سووشدی و بو اوشاق بوی آچدی , بویودی آمما گئنه سحرلر دان اولدوزو باتمامیش ائودن ائشیگه چیخیب و گئجه چاغی ایشدن قاییدیردی. حلال پول قازانماق اوچون.

قاپی-قونشو , ائل-فامیل اونو بیر چالیشقان , دوز یولدا اولان و فوتبال ده لی سی تانیردیلار آمما بیر موشکول یاراندی اونون یاشاییشیندا. بیردن شهرده سس قاوزاندی کی بو گئنج اوغلان چوخلی بورج گتیریب و چوخلی آداملارا بورجلی دوشوب. سونرا دا خبر چیخدی کی ایشینده ورشکست اولوپ و شهردن ائشیگه چیخیب  تا بلکه بیر یول تاپسین و یا وام جورله سین تا بورجلارین وئرسین آمما گئنه ائلیه بیلمه دی تا نئچه آیدان سونرا توتولوب و زندانا دوشدی.

بو اوغلان منیم دایی اوغلوم دی. نئچه گون بوندان قاباق اونون ملاقاتینا گئتدیم.

سینیخیب و داردا قالان آصلان کیمین پوزغون گوردوم اونو.

کئفین سوروشدوم گوزلریم دولا-دولا.

-          ساغ اول دئدی یاواش سسله و حزین باخیشلا. عمه جانیم نئجه دی سوروشدو.

ائلین فامیلین احوالاتیندان اونا سویله دیم. حسرتیلن قولاق آسیردی , گوزلرینده آزادلیق قوشونا یالواریش گورونوردی و سسینده آزادلیقا اومماق.

بیردن گوزلری گولدی , سسی دیرچلدی و اوزونی بیر سوینج دولاشدیردی. تیراختوردان سوروشدو. آخی اونو تیراختور ده لی سی آدلا دا تانیردیلار یولداشلاری. تیراختورون اویونلارین استادیومدا گئدیب باخاردی و عشقیلن تیراختوری سئویب و آلقیشلاردی.

-          تیمیمیز ده اوتدی بو اویونو دئدی. گئتمیشدین سهنده؟ سوروشدو.

-          هه دایی اوغلو , اوتدی . من ده گئتمیشدیم , یئرین بوش ایدی. گوزل اوینادی و گوزل  نتیجه آلدی , اوقده ر یاشاسین آذربایجان دیه رک چیغیرمیشام کی بیر هفته دی سسیم ائله توتوخدی.

گوزلرینده گئنه حسرت گوروندی.

- بوردا من گویلیمی تراختورونان خوش ائله ییرم دئدی. تراختور منه اومید وئریر , آزادلیغا , اوتماغا و باش اوجالیغا . تراختور منه تکجه شادلیق خبری گتیرن آزادلیق دونیاسیندان دی. بوردا دا هامی منی تراختور ده لی سی دئییر و او قده ر تراختوردان دانیشیرام کی لاپ بورداکیلارین بئینین یئمیشم دئدی و گولدی. تراختور اوتوزاندا منیم بو دارلیغیمدا بیر آیری زینداندا اولدوغومو دوشونورم دئدی.

واقتیمیز قوتولوردی و سوزوموز اوزون , بویله بیر واقتلاردا بو سوزلری قوتارماق اولمور کی.

بیر دونیا زامان گرک وئریلسین تا اورکده قالانان سوزلر دئییلسین.

تراختورون عشقی بوتون یئرلرده یاشاییر و ایزی هر یئرده گورونور ; اوشاقلارین آینا کیمین آیدین اورکلرینده , آنالارین محبتلی نفسلرینده , آتالارین یورقون گوزلرینده , دانشگاه لاردا , مدرسه لرده , توکان-بازاردا و حتی ....... زندانلاردا.

پس تیراختور , سن اومید سن بیر میللته , بیر یوردا.

باش اوجا یاشا , میللته خاطیر , تورک قیزلارین و ایگیت اوغلانلارین شرفینه.

سن توتقون اورکلرین سوینج بهانه سی سن.

یورو تیراختور , یورو , دالدا قالما . سن یوردونون قهرمانی سان و داردا قالانلارین ......

با تشکر از Sattar Elim

  http://www.trakhtorfans.com/1389-01-14-11-35-35/58-maghalate-trakhtorchilar/2147-1389-12-06-15-08-54.html