هایکیر سسینی وطن اوغلو؛ هایکیر هایدی دورما؛ اوغورلار بیزیمدیر...

چهارشنبه, 14 دی 1390 ساعت 19:38

Tiraxturfans.Com. تیراختور ایرانین اوستون لیگاسینا گلمه کله چوخلو بیرزادلاری دئییشدی. تئهرانین سئوگیلی قیرمیزی-ماوی تاکیملارین گؤزده ن سالاراق ایران مئدییالارینین باخیمین بوتونلوکله اؤزونه ساری چکدی. تیراختورچولار آزربایجانین قیرمیزی سیمگه سین ال لرینده دالغالاندیراراق ایرانین باشا-باشیندا اولان مئیدانلاری آیاقلارینین آلتینا آلدیلار. آنایورد دالغاسی ایرانی تیتره تدی. تیراختور میلیونلار سئودالی آرخاسیندا گؤره ره ک ایرانین ان چوخ سئویله ن تاکیمینا چئویریلدی. بو سئوگینین گؤبه یینده شوبهه سیز آزربایجانین قوتسال آدی پارلانماخدایدیر. وطن ایگیدلرینین بوغولموش دویغولاری بوتون مئیدانلاردا اؤزه للیکله «قیرمیزی قوردلار وادیسی» آدی اؤزونه آلمیش آزربایجانین «سهند» ایستادییوموندا اوجا سسله باغیریلدی. یوز مینده ن آرتیخ ایگید بوتون دویغولارییلا سس-سسه وئره ره ک «یاشاسین آزربایجان» گؤستریسی ایله ایستادییومو پاتلاتدیلار. «آزربایجان یوردوموز، تیراختور بوزقوردوموز» گؤستریسی کی تیراختورو آزربایجانین بیر سیمگه سی اولاراق گؤسترمک ایسته ییردی اوجا سسله سسلندی و ایل لر بویو یاساقلانمیش «تورک دیلینده مدرسه، اولمالیدیر هر کسه» گؤستریسی تیراختورچولارین ایلک گؤستریسینه چئویریلدی. تیراختورچولار اورمو گؤلونون قوروماق تهلیکه سین درینده ن دوشونه ره ک بوغازلاریندا قالمیش دویغونو «گلین گئداق آغلییاق، اورمو گؤلون دولدوراق» گؤستریسی ایله سو ائتدیلر. تیراختورچولاری نه قده ر گؤزو گؤتورمه یه ن چوخ اولسادا اؤزلرین ایرانین ان جوشغون یاردیمجیلاری اولاراق تانیتدیلار و ایکی ایل آردیجیل تیراختور یاریشمالاری ان چوخ یاردیمجی گؤره ن اویونلار سئچیلدی. تیراختورچولارین حیماسه سی ایران سینیرلارین آشیب و دونیا مئدییالاریندا اؤزونه یئر آچدی، قلم لر ایشه دوشدو و آناوطنین سارسیلماز و یورولماز اوغول و قیزلاری ال لرینده ن گله نی اؤز سئودیکلری تاکیما ایتحاف ائتمه یه چالیشدیلار. بو حیماسه ده ن نه قده ر یازارساق یئنه ده اونون بؤیوکلوغون و ایچینده اولان آنلامی اوجور کی گره ک گؤستره بیلمه یه جه ییک آنجاق بو حیماسه نین نه قده ر بؤیوکلوغونا باخمایاراق ایران اؤلکه سینین هر زامانکی عنعنه سی کیمی قارانلیق سئوه نلر و ایشیق دوشمانلاری بو حیماسه نی کیچیلتمه یه و ائتکیسیز ائتمه یه چالیشدیلار و ایندی اؤز خایال لاریندا تیراختورچولارین اوتون سؤنموش ببله ره ک اوزاقدان اونلارا باخیب گولمکده دیرلر! آمما تیراختورچولارین یاراتدیغی حیماسه لری درینده ن دوشوننلر بو سورو ایله اوزلشیرلر "بو حیماسه لر داها سونا چاتدیمی؟" آزربایجان میللتینین تاریخ بویو مدنییت، باخیش و دوشونجه سی ایله یاخشی تانیش اولانلار بیلیرلر کی بو چالیشقان میللتین ایگیدلری هئچ زامان سس سیز قالماییب و هر زامان اؤنده گئده نلرده ن اولموشلار. آیدیندیر مین ایلده ن چوخ ایراندا سولطانلیق سوره ن تورک لرین نسیلینده ن اولان گئنج لر یئنه ده تاریخین هر زامانی کیمی اؤز گؤره ولرین یئرینه یئتیرمک ایسته ییرلر. تیراختورون سونوجلاری تیراختورچولارا اؤنملی اولسادا هئچ زامان سونوج اوچون سئودیک لری تاکیمی سئومه ییبلر و ایندی 11-جی لیگانین ایکینجی یاریسی باشلانماقدادیر و تیراختور بیر قده ر گوجون آرتیراراق یئنی مئیدانلارا آیاق قویماقدادیر و تیراختورچولار سئودیک لری تاکیمی شامپییونلوغا دوغرو آپارماق اوچون یئنه ده ایستادییوملاری دولدورماق دوشونجه سینده دیرلر. تیراختور بیر ائتئنیک تاکیم اولاراق بللیدیر شامپییونلوق تیراختورچولارا یالنیز بیر یولدور کی کیملیک چرچیوه سینده اولان ایستک لرین ایران ساهه سینده باغیرسینلار. آینی گون (جوما گونو) چیلله آیینین 16-سی تیراختور آزربایجانین قوم شئهیرینده صبا تاکیمیندان قوناقچیلیق ائده جکدیر. کئچن ایکی ایلده قوم شئهیرینین تورک لری کی بو شئهیرین خالقینین چوخونلوغون اولوشدورورلار ایستادییومو تیراختور بایراغی ایله بزه ییب و ایندی بیر داها ایستادییومو دولدورماق و صبا تاکیمین اؤز ائوینده قوناق ائتمک ایسته ییرلر. سئویملی تیراختور اوچون اوغورلار آرزی ائدیریک... یاشاسین تیراختور یاشاسین آزربایجان یاشاسین وارلیغیمیز آرتان آرمان