بیر گون ترافیک ایچینده …..

ایندی‌یاننچز اولموش کی بیر سیجاق گونو ایشدن بوکولموش و ترافیک ایچینده قالمیش اولانگیز ؟

 

ماشین لارینگ بوقو سسی، آداملارینگ داهواسی و بیر دقی تئزتر گئدمگ ایچین بیربیراینن دویوشماگی سیزی آجبخلی ائده ائله کی داها قچینگیز کلاچ ترمزی باسا بیلمایا.

بو وضع ده قیرمیزی چراغ قولونجوندا دورماگ داها آمان دیر بیردن شیشه‌یی اوخاری وئریرنگیز کولرو آلیشدیریرنگیز و اوندا کی بیر آز کولر یئلی احوالینگزی ائسیلدی الینگیز ضبط دوکمه سینی باسیر بیر مقام خسرودن قولاقینگزه ده‌ییر بیر اوزاق هنه ایچه‌ریدن چکیرنگیز و آرام دوورورنگیز تا قیرمزی چراغینگ فورصتی تامام اولا. وقتی گئدن آغیر ائل مقامی ضبط اوستونده سسی گلیر اوزاق ائلی یادا گتیریرگ بئله دوشونجویا گئدیریگ کی بیر زامان دووار دیشار دالیچاز داغلاردا چولاردا سو سسینن چول اتگیندا گون گچیردیرمیشاگ سرئین یئل داغ چوره‌گ ساج اوستونده خونوک آیران تولوغ ایچینده بیر بن کولگه سی قوزو مله دیگی آخ کی اوره گینگ قنج گئدیر او گونلر ایچین کی بیردن اوزونگه گلیرنگ چیراغ گوی اولموش و سن هله دوورموشانگ هر کیمسه بوق وورور بیر گولوشلانیرنگ و قچینگی گازا باسیرانگ .

هئچ اولموش یولداشینگ دالیچا گئدنگ سورا ائله کی میندی ماشینا ضبطینگ اوخویا "سلام وئردینگ سلامینان تانیدیم دوس سنی گلدیگیم بیله‌مدیم ....."سورا وورانگیز گولماگ آلتینا و بیر قالمالی خاطره قالا بئلنگیز ایچین؟ شاید دانشجویانگیز و بو ترم مشروط اولموشانگیز و اوره گینگیز دولو دور و بیر دنگیزچز بغض خریقینگیزی آلمیش و سیر سیزینگ هنه نگیز یولونو کسه ائله بئله کی بیر تاکسیا مینیرنگیز بیردن فرود سازینینگ سسی قولاقینگزا ده‌ییر کی تاکسی ضبطی اوستونده اوخویور و داها اوزونگی ساخلایا بیلمیرنگ و یوواش یاش لاری گوزلرینگ کونجوندان یانخلار اوستونه ویل ائدیرنگ بو اون دقی کی تاکسی ایچیندایانگ فرود سازینن آغلایرانگ و سورا کی ایستیرنگ ائننگ اوره گینگ بوشلانمیش و داها بغض ایستمیر سنی اولدورا آرام اولموشانگ .

 بیر آدامنگ کی دانشگاه جوغابینی تازا آلمیشانگ و اوزونگ ایچیندا یئرلشمیرنگ قانات یوخونگ وگرنه اوچاردینگ ائله کی مینیرنگ تاکسیا اونونگ ضبطی اوسا ابراهیم سازینی چالیر و سن ائیناق تر اولیرنگ و اوره گینگده بیر هلیه گیریرنگ یاغلیق آتیرنگ و سورا ائننده بیر آز چوخ تر ده کرایه وئریرنگ. .

بیر هفته زندگانلیگ شهر ایچینده و چتین ایش لر الیندن کی خلاص اولیرگ و خانواده اینان داغینان داشا وورورگ و بیر گوی چوله قونیرگ و اوزوموزو شهر هیاهوسوندان ایراق ائدیرگ ماشین آغزینی آچیراگ تا بیر ایلگر مسعود نامداریدان ائشیدگ یا بیر مقام گلن آتلی محمد جاویدی اثریندن ائشیدگ .

بیردن قوجا بابامیز چاغیریر آهای اوشاق او ارسلان تارینان جرسالان شعرلرینی قوی تا قولاق آساما !!! گئنه آنام کی بیر پارا زامان اوزوینان دورونگه ائدیر چاغیریر بو طهمورث خان سسینی قوی تا جوشام و بئلنگیز ایچین اییرلایام تازا کوموجا باجی دا هلی گزیر اوینایا هر کیمسه اوز اصالتی فرهنگی دالیچا گزیر .

و بیزیم ماشین دا واری سینینگ سی دی سی واردیر . بو داستان لاری دئدیم کی دئیم بیز قشقایی لار اگر مینگ ایل‌ده شهره گلمیش اولاگ آما موسیقیمیز واری کرز بئلمیزینن وار و دیریلیگ ائدیر و اونوتا بیلماگ آما هئچ اوزوموزدن سوروشموشاگ بو آهنگ لر بو اییرلاماگ لار نه ایین سی دی اولیر و بیزیم الیمیزه چاتیر .

بیر هنرمند گزیر بیر پارا شعیر بولیر بئش آلتی سازینان نئچه آی چالیر و قولاق آسیر تا او کی ایستیر اولا سورا بیر ایرچی بولیر گئنه نچه آی ایرلاییرلار تا اولا ائله او سازی سسی تازا گئدسی دیر بیر استودیو ایچینده ناغاد پول هر ساهات ایش ایچه وئره و نئچه آی ضبط ائده تا ایشی بیر کیفیته ائتیشه کی قولاق آساندا آداما لذت وئره سورا تازا بیر آی داها گوندن شاما قولاق آساسی تا ایرادلارینی توتا سورا نئچه آی بو ادارا او ادارایا قچه تا مجوز آلا سورا بیر وام آلاسی و ایشینی پخش ائده بو امیده کی ائلنینگ خلخی ایشینی آلا هم قولاق آسا لذت آپارا هم ده اونا کمک ائتیشتیره کی آیری اثری اوستونا ایش گوره آما وقتی او هنرمند ایشینی آلمیاگ و اوستوندن بیر اوزوموز ووراگ بو اولیر کی هنرمند اون میلیون پولو گئدیر و داها باشارمیر بیر یئنگی ایش یارادا همی اوز هنریمیز و هنرمندیمیزه ضربه ووروراگ و همی ده اوزوموزو بیر یئنگی اثر ائشتدیگدن محروم ائدیرگ گلگ هر بیریمیز اولاگ هنرمندلریمیز وکیلی گلگ گوزلایاگ امانت لرینی ساخلایاگ تا قورخو اونلاردان ال گوتورا و بیر آرام خیالینان ساز چالارلار شعر یازالار و بیر سی دی یا بیر کتاب بازارا وئرلر .

• گلینگیز تعصبیمیزی ائلمیز فرهنگی اوستونا بوردا گورسه دگ سی دی آلاگ و بیر بیرا سوغات ائدگ آما سی دی اوستوندان وورمایاگ

یازان:فتانه مرادی قرقانی